Այս տարի բացելու ենք Ավետարանի և Խոսքի դուռը. հովիվ Արթուր Սիմոնյան

Այս տարի բացելու ենք Ավետարանի և Խոսքի դուռը. հովիվ Արթուր ՍիմոնյանՀիսուսն ասաց․«Ես եմ դուռը» (Հովհաննես 10.9): Ամենաէական բաներից մեկը դուռն է, որով մենք ներս ենք մտնում կամ դուրս ենք գալիս: Կան դռներ, որոնք բացվում են, և կան դռներ, որոնք փակվում են: Ո՞ւմ կամ ինչի՞ առաջ ենք դուռ բացում` մեղքի՞, թե՞ Աստծո…

Կարևորը միայն այն չէ, թե ինչ դուռ է իր կյանքում բացում մարդը, այլև այն, թե ինչ դուռ է բացում եկեղեցին իր երկրի համար: Օրհնությունների այն դուռը, որ կարող է բացել եկեղեցին, ոչ ոք չի կարող բացել:

Եվ այն դուռը, որ մենք այս տարի պետք է բացենք մեր երկրի համար՝ Ավետարանի և Խոսքի դուռն է: Եկեք լինենք մարդիկ, ում միջոցով Աստված կբացի այն:

Բացի Ավետարանի դռնից, գոյություն ունի մի բացասական դուռ՝ դժոխքի դուռը, որը բաց է շատ երկրներում, սակայն մենք կարող ենք այն փակել, եթե միայն բացենք Երկնքի դռները:

«Ես էլ ասում եմ քեզ, որ դու ես Պետրոս, և այդ վեմի վրա կշինեմ իմ եկեղեցին, և դժոխքի դռները չեն հաղթի նրան» (Մաթևոս 16.18):

Այս տարի մենք պետք է փակենք դժոխքի դուռը և բացենք Ավետարանի ու Խոսքի դուռը, օրհնությունների ու Երկնքի դուռը մեր երկրի, մեր ընտանիքների, մեր եկեղեցու համար, և ոչ ոք չի կարողանա փակել դրանք:

Հավատքը գործողություն է։ Եկեք թակենք, և Տերը կբացի այդ դռները։ Ես հավատում եմ, որ եթե մենք լինենք համարձակ և քարոզենք Ավետարանի Խոսքը, Աստված արդյունավետ դուռ կբացի մեզ համար, և շատ պտուղ կունենանք։

«Որովհետև ամեն խնդրող առնում է, և որոնողը գտնում է, և դուռը թակողին կբացվի» (Մաթևոս 7.8):

Աստծո սերը, շնորհքն ու խաղաղությունը ամենիդ հետ լինի։ Ամեն։