Ժպիտի համաշխարհային օրն է

Ժպիտի համաշխարհային օրն էԱմեն տարի հոկտեմբերի առաջին ուրբաթ նշվում է Ժպիտի համաշխարհային օրը: Այս հրաշալի տոնի համար աշխարհը պարտական է նկարիչ Հարվի Բելլին:

Նա ապրել է 20-րդ դարում, Ամերիկայում: Նրա ստեղծագործություններն առանձնահատուկ որևէ բանով աչքի չեն ընկել:

Սակայն մի օր նրան դիմել են «State Mutual Life Assurance Company of America» ապահովագրական ընկերության ներկայացուցիչները՝ խնդրելով որևէ վառ և հիշվող խորհրդանիշ մտածել, որը պետք է դառնար ընկերության այցեքարտը:

Առանց երկար-բարակ մտածելու՝ Հարվին ընկերությանն առաջարկել է այն, ինչը համացանցի օգտատերերը կոչում են «սմայլիկ»՝ ժպտացող դեղին դեմք: Դա 1963 թվականին էր:

Ժպիտի համաշխարհային օրն առաջին անգամ նշվել է 1999 թվականին: Նկարիչը կարծում էր, որ այդ օրը պետք է նվիրված լինի լավ տրամադրությանը: Օրվա կարգախոսն է՝ «Do an act of kindness. Help one person smile», ինչը կարելի է թարգմանել այսպես. «Բարի գործ արա: Օգնիր, որ գոնե մեկ մարդ ժպտա»:

Աղբյուրը՝ news.am